السطمبالي هو موسيقى روحانية قائمة على التواصل مع الارواح. وصل لتونس عبر تجارة العبيد الي جابوا معهم ثقافتهم الروحانية والموسيقية. وكي وصلت لتونس تأقلمت مع الثقافة الإسلامية ولت جزء من التراث. الموسيقى هذي هي قائمة على مجموعةمن الآلات وكل وحدة عندها دور باش تخلق الاجواء الروحية والآلة الأهم هي القمبري، آلة تشبه للقيتار لكن فها تلاث اوتار والموسيقى الي يعزفها هي الي تحل الباب للتواصل مع الارواح.
“الينة” والا “المعلم” هو الشخص لي يعزف على القمبري وحسب التقاليد لزم يكون شخص مختار من الصغرة وعندو موهبة معينة تسمحلو يعزف على القمبري. الآلة الثانية هي الشقاشقى، صفايح مصنوعين من الحديد مهمتهم في طقوس السطمبالي يخلقو الريتم الجماعي باش يحضرو الجو الروحي ولزم يكونو مصنوعين من الحديد بالذات لانو في عالم الارواح صوت المعادن فيه سر يسهل استحضار الارواح.
وكيف كيف بالنسبة للطبلة لي هي الآلة الثالثة ويستعملها برشا كي تبدى طقوس الستمبالي في الشوارع والا في أماكن مفتوحة. والعنصر الأساسي في السطمبالي والي باش يكون هو الوسيط بين الروح والناس يتسمى ” العريفة” وهولي يتملكو الروح ويتكلم على لسانو.
السطمبالي ليوم مزال يتحكى عليه كموروث ثقافي في تونس وهو شاهد على التفاعل الثقافي بين تونس و إفريقيا جنوب الصحراء.
المصادر:
Richard C. Jankowsky, Stambeli: Music, Trance, and Alterity in Tunisia
Stambeli, the spirits’ last dance: a PAM original documentary